süsser die Glocken nie klingen

Hüt znacht

Hüt znacht häts mer träumt.

Rat, was hani gseh?

s lieb Wiehnachtschindli, so wiss wie Schnee.

Es hät en Baum und Päckli treit

Und hät mer ganz lis is Öhrli gseit:

Wenn du rächt lieb und artig bisch,

So stell ich das uf eure Tisch.

Jetzt will ich lieb und artig sie,

Dann sind die schöne Sache mi!

August Walter

Im Winter

Wie wärs doch au im Winter

So trurig und so schwär,

Wenn nid s lieb Wiehnachtschindli

Uf d Ärde gfloge wär.

Wenn nid sis Tannebäumli

Dur Tag und Wuche us

Is hinderscht Eggeli zündti

Vom allerchlynschte Huus!

O liebe Wiehnachtsängel.

Chum emel gärn und gschwend,

Du triffscht en heiteri Schtube

und luter bravi Chend!

Sophie Hämmerli-Marti

Wiehnachtsschtimmig

Lueg, s Räuchli  schtygt bolzpfyffegrad

Zum Chömi us i d Luft,

All Bäum händs Fyrtiggwändli a

Vo glitzerigem Duft.

Und d Sunn schtreut Diamante dry

Lueg Chindli, lueg die Pracht.

Wie rüscht sie d Wält voll Seeligkeit

Scho uf die heilig Nacht!

O Mönschechind, machs au eso,

Bis zwäg, wänns nachte will,

Dass dir de Schtärn vo Bethlehem

Cha ufgah, gross und schtill,

Dass är dir lüüchtet tüüf is Härz,

Und won är anezündet,

I dynere duftig reine Seel

Au Diamante findt.

 Emilie Locher-Werling

Es Schtöbli no so chlii

Und isch äs Schtöbli no so chlii,

So chunnt s Chrischtchindli doch au dri

Ond zöndet de äs Bäumli a

Mit schöne Sache drum ond dra.

Ond isch es Schtöbli no so chlii

's mues doch es Chindli dinne si,

Wo artig isch und floge cha,

Dass sini Ältre Freud chönid ha.

unbekannt

Weihnacht Zauber der Vergangenheit

noch eins...

Weihnachtszeit